عــودة هنــداوي

عــودة هنــداوي

.. بعد مرور تسعة أشهر عجاف, و ولادة متعسرة لنور الفجر . قرر (هنداوي) أن يخرج عن صمته الذي طال ؛ ظناً منه أن دوره قد انتهى , و أن الثورة قد شقت طريقها, لكنه وجد أنه ارتد ثانية إلى الخلف. و عاد إلى نقطة الصفر. جلس (هنداوي) على المصطبة مستنداً إلي الحائط , ممسكاً بكوب من الشاي في يده . ثم قال بعد أن رشف رشفة كبيرة محدثاً صوتاً عالٍ:
- مافيش فايده..!! الناس دي مش عاوزه تفهم أبداً..؟! يعني نروح نقلعلهم ملط في الميدان.. عشان يقولوا هنداوي اتجنن تاني..!! نعملهم ايه بعد كده..؟! سبناهم يحكموا ويتحكّموا.. قلنا معلش ماهم ولادنا برضو.. قالو نعمل انتخابات الأول قلنا و مالو.. مايزعلش حد .. قالوا دستور.. قلنا دستور ياسيادنا.. قالوا فلول.. قلنالهم هاتوا اللي تجبوه.. و الله مابتفرق معانا الأسماء.. قوم بعد دا كله.. يموّتو ولادنا اللي نفدو من الموت الأولاني..؟! قال هي ناقصه..!! ولا يعني هما بيستقوو بس على الضعفه..؟! آه مهو أصل الكتره تغلب الشجاعه.. الله طب مش أحنا الأكتر برضو..؟!
ثم نظر فيمن التفوا حوله من الفلاحين البسطاء, فوجدهم قد فغروا فاههم, و جحظت أعينهم , ينظرون إليه في بلاهة. فاستطرد قائلاً:
- أنا نفسي أعرف بس.. هما عاوزين منّا إيه..؟! يعني هما عاوزين البلد تخرب..!! ولا عايزنا نهج ..و نسبلهم البلد.. يعني تبقى البلد بلد أبونا.. والغُرب يطردونا.. طب أمال إيه لزمتها الانتخابات.. و المؤتمرات في التلفزيونات..؟! و الكلام الكتير .. إللى بقى مفيش أكتر منه.. زي الهم على القلب.. ماهو كل حاجه رجعت تاني زي الأول ..و أسخم..!!
تلفت حوله في تعجب , ضاربا كفاً بكف , ثم قال متسائلاً :
- حد فيكم ياولاد .. فاهم حاجه في الانتخابات..؟!
فهزوا جميعهم رؤسهم علامة النفي , فضحك قائلاً:
- مأنا بقول كده برضو..!! يعني الناس اللي بره حتصوت ولا لأ..؟! إذا كان محدش من اللي جوه عارف الانتخابات هتتعمل من أصله ..!! و لو هتتعمل هتتعمل امتي..؟! ولو عرفنا امتي.. هنصوت ازاي..؟! و مين اللي هيحميها..؟! إذا كان حاميها حراميها..!! طب القاضي هيعوضوه بمليون جنيه لو مات.. امال الشعب مين اللي هيعوضه..؟! وهيجيبوا الفلوس دي كلها منين..؟! آه ماهو أكيد من قفا الشعب برضو..!! طب ايه بقى كان لزمتها.. إذا كان مش عارفين هنتتخب مين أصلاً..؟! و بعدين مهما هما .. اللي كانوا بينزلوا كل مره نازلين تاني..!! أمال بيقولوا ليه إن كل حاجه هتتغير بعد الثوره..؟! أنا شايف كل ولاد فرحات باشا.. نازلين قوايم ..و نوايم .. فئات و مستقلين.. دا حتى بناته و أجوازتهم نازلين كمان..!! أهو لو دا مكسبش غيره يكسب..!! و ولادنا ياعيني غلابه .. ممعهمش حتى يدفعو تمن الاشتراك..!! طب كان إيه لزمتها الهوسه دي..؟! الله يرحم أيام زمان.. كان الواحد صوته بيتحط .. وهو نايم في البيت.. مستريح أربعه وعشرين قيراط .. ولا شايل هم أيوها حاجه..!!

يتبع إن شاء الله

(2)

اعتدل (هنداوي) في جلسته فجأة, و رفع عقيرته قائلاً:

- لازم كلنا نروح الإنتخابات يا ولاد .. و نحط صوتنا للي نختاره .. و نشوف إنه يستاهل .. مش إللي يحط في إيدنا 50 جنيه مكرمشه.. ولا يجبلنا شنطة زيت وسكر ..ولا بطانيه في الشتا ..أو مروحه في الصيف ..ولا للي بيسرق قوتنا و قوت عيالنا .. ولا لأصحاب المصالح إللي عاوزين ياخدونا سلم ..علشان يطلعوا على أكتافنا ..و بعدين منشوفهمش إلا في الإنتخابات إللي بعدها .. علينا و عليكم خير..!!
ثم نظر لهم في حزن , و قال بأسى هامساً:
- كمان .. حكمن أنا سمعت طراطيش كلام .. إن اللي مش هيروح هيدفعوه 500 جنيه.. يعني مش هيدونا فلوس إننا روحنا ..و استحملنا البهدله.. و ممكن كمان تضيع روحنا ..لأ كمان عايزين يدفعونا ..هوا إحنا لو كان معانا 500 جنيه.. كنا قعدنا في البلد..!! صحيح ياولاد .. معدش فيه حاجه في الزمن ده ببلاش.. حتى الحريه..!!
ثم هب واقفاً ,و اقترب منهم واضعاً يده على فمه ,و وشوشهم قائلاً:
- طرطئو ودانكم ..وخدولي بالكم.. أصل الحيطان لها ودان ..و ربنا يجعل كلامنا خفيف عليهم.. أنا بس خايف ليولعو البلد ..و يحرقوا الصناديق ..أو يرموها في الترعه زي زمان .. حكمن البلطجيه بقم موجودين في كل حته..!! الموضوع مبقاش على قد فرحات باشا البنهاوي.. و العصابه بتاعته بس..!! لأ بقى معاهم كمان .. كل الناس إللي كانت بيوتهم مفتوحه من وراه.. و اتعودو على العضمه إللي كان بيرمهالهم كل أول شهر.. و البلطجيه إللي كانوا تحت إيديه ..بيدورو على حد تاني يأكلهم دلوقت ..أنا حاسس إننا داخلين على يوم أسود غطيس..مطلعتلوش شمس ..ربنا يستر..!!
ارتفعت الهمهات المؤيدة, والمعارضة, المترددة ,و المؤكدة , فأشار لهم أن يهدأوا. ثم أردف قائلا:
- بس صبركم كده عليا شويه.. متبقوش عاملين زي البهيمه الحرنانه ..!! ماهو الغمه دي مش هتنزاح إلا بالإنتخابات برضو.. على رأي المثل .. العجل لو وقع بتكتر السكاكين ..و أنا شايف ماشاء الله .. الكل سانن سكاكينه .. وعايزين نصيبهم من التورته ..الحمد لله.. أنا زي ما انتو عارفين.. ماليش في الجاتوه ..حتى إسألوا بسنت الجاموسه.. الله يمسيها بالخير.. و يبشبش الطوبه اللي تحت رأسها.. هييه .. من يوم مافارقتني و أنا مبشفش النوم.. أي والله ..!! عموماً نرجع لمرجوعنا.. أنا قلتها قبل كده.. و بقولها دوم .. لو ماحطناش عنينا في وسط رأسنا ..هيخدونا لحم و يرمونا عضام.. و ياريت هيسبونا عضم ..لأ .. هيمصمصونا كمان..!!

(3)

عاد (هنداوي) بعد إدلائه بصوته في الإنتخابات, سعيداً أيما سعادة, رافعاً أصبعه السبابة , كي يري الجميع الحبر الفسفوري, و أخذ يقبّل كل من يقابله من أهل البلدة مهنئاً , مشيراً بأصبعيه علامة النصر. ثم قال بكل فخر:

- الحمد لله.. ياولاد ربنا قدرني .. و حطيت صوتي لأول مره في حياتي .. أي نعم أنا قعدت يومين قدام باب اللجنه .. و بيّت في البرد و تحت المطره .. عشان أعرف أحطه..!! بس مش مشكله.. يعني هوا أحنا أقل من اللي متبهدلين في التحرير.. دا أقلّها واجب أن الواحد يؤدي واجبه .. و يدي صوته للي يستحقه.. و أهو كمان بيتّنا .. عشان نحرس الصناديق .. من البلطجيه .. و المزوراتيه.. و بتوع الداخليه.. الله يسامحهم بقه..عشان متبقاش الانتخابات زي كل مره .. و نبقى كأنك يا أبو زيد ماغزيت..!!
كان هناك أحد المراسلين الصحفيين لأحدي القنوات الفضائية المحظورة, الذي سأل بدوره (هنداوي) عن ما رأي في الانتخابات, فأجابه كعادته على الفور:
-الطوابير كانت يامه.. و الناس ياولداه واقفه لحم على بعضها.. و أنا خايف أطلع من دوري لحسن حد تاني ياخده.. و البهوات القضاه جم وخري.. يمكن بعد إدان الضهر.. على ماصحو من النوم .. و ربطو البتاعه دي اللي في رقابيهم .. و فين و فين على مافتحو اللجان.. و ناس كتيير قاعدين ينظموا في الطوابير .. و ساعات يوزعوا منشورات عليها تصاوير لناس منعرفش مين دول.. ولا نزلو علينا من أنهو داهيه.. كمان لمحت الواد سعداوي البلطجي بتاع فرحات باشا البنهاوي الله يمسيه بالخير .. و معاه كام عيل شمامين بيلفوا حوالين الطوابير.. الحق لله أنا خفت منهم.. بحكم العاده بس.. لكن كلنا اتشجعنا و طردناهم بره اللجنه.. و كان فيه باشا من اللي مرشحين نفسهم في الانتخابات.. و معاه شويه من المطبلاطيه بتوعه .. ماشيين وراه و بيهللو له .. و بيرشّو فلوس على الناس اللي واقفه على حيلها من صباحية ربنا.. أنا قلتلهم خدوا فلوسهم.. و انتخبو إللي يعجبكم.. ماحدش هيكون بينكم و بين نفسكم إلا ربنا.. و كان فيه ناس ولاد حلال.. بيجبولنا أكل و ميه و أحنا واقفين ..و جابولنا أكياس مشمع حطاناها فوق رأسنا.. لما الدنيا مطرت.. و جابولنا غطيان بالليل .. لما نمنا في الطوابير قدام اللجنه.. بعد لما البهوات القضاه قفلوا اللجنه.. و شمعهوها بالشمع الأحمر.. و قاللونا الورق خلص.. و راحو قال إيه .. يصلو المغرب و مارجعوش..!!
فسأله المراسل في خبث:
- يعني ماشفتش.. أي عملية تزوير في الانتخابات دي..؟!
قاطعه هنداوي نافياً بشكل قاطع:
- لأ .. تزوير أيه يا بيه..؟! هوا مين اللي هيسمحلوهم بكده ..؟! دي الناس كانت كلتهم.. بقا معقول بعد ما الناس شافت ولادها و هيا بتموت قدام عينها .. هتسمح لحد يضيع دمهم هدر.. هوا بس الخوف .. أنهم يعني يعملوا زي أيام زمان .. و يرمو الصناديق في الترعه ..و يجيبو صناديق متعبيه بمعرفتهم ..أو أنهم يلغو أصواتنا من أصلو .. بعد التعب و البهدله اللي احنا شفناها اليومين دول.. و ينجّحو اللي هما عاوزينه برضو.. يعني كان فيه حد معاهم ولا شاف حاجه..؟! أو ينهو الإنتخابات ..و ساعتها يبقى كل تعبنا راح على فشوش..!!

(4)

أعجب الرجل كثيراً بفصاحة (هنداوي) و نباهته , و خطر له خاطراً ؛ رغم طرافته . فسأله ساخراً:

- يعني أنت مبتفكرش ترشح نفسك للرئاسة .. ياعم هنداوي..؟!
ابتسم (هنداوي) ابتسامة عريضة حتى بانت أسنانه الأمامية المكسورة , و قال ضاحكاً:
- آآآآنيّ ..!! أنا مش بتاع مناصب ولا يحزنون.. هوا أنا مجنون ولا أكونش مجنون إبن مجنون ..!! دا إللي حيرشح نفسه بعد كده هيطلعو روحه .. زي صاحبنا بتاع زنجه زنجه .. ولا يشنقوه زي مهيب الركن أبو عدي .. ولا هيسودوا وشه .. زي عمنا أبو أحمد .. ولا هيمرمطوه في المحكام زي المخلوع أبو علاء .. ولا هيطردوه زي شين العابدين ..ولا هيضربوه بالرصاص زي .... الله هوا لسه مامتش..؟! أهو دوره جاي جاي..!! لا ياعم البركه في الشباب .. جسمهم يستحمل البهدله شويه.. كفايه عليا أكون في مجلس الحُكمَه.. و قعدتي على المصطبه ساعة المغربيه.. بالدنيا و مافيها.. و بعد صلاة العشا أحط دماغي على المخده .. و أروح في سابع نومه لحد الفجر.. و يجعله عامر.
ابتسم الرجل , و أراد أن يداعب (هنداوي) مرة ثانية فسأله :
- يعني ياعم هنداوي.. لو فرضنا مثلاً .. يعني .. أنك بقيت رئيس جمهورية بحق و حقيق .. هتعمل إيه ..؟! و إيه القرارات إللي هتاخدها .. عشان تنقذ البلد..!!
تجهم (هنداوي) و قطب حاجبيه , و ذم شفتيه , ثم جلس مفكراً ؛ كأنه صدق بالفعل أنه أصبح رئيساً للجمهورية . و قال في حزم :
- أول حاجه أعملها .. ألغي الداخليه.. و أعمل وزاره تانيه .. من أول و جديد..!!
تعجب المراسل من كلام (هنداوي) , و ظن فيه خبالاً , فسأله مستهزئاً:
- تلغي الداخليه مره واحده..!! طيب ليه..؟!
أزاح (هنداوي) العمامة , و هرش رأسه مفكراً , ثم قال :
- ماهو يا باشا على رأي المثل إللي بيقول .. أقتل الكلب لو مات سيده.. عشان هيعض أي حد يمدله إيده.. أصل عمر ديل الكلب ماهيتعدل .. و لو علقو فيه قالب.. لأن طبع الغدر فيه هيكون غالب..!!
فسأله دهشاً:
- و هتمشي البلد إزاي..؟! و هتمنع المجرمين و البلطجية إزاي..!!
ابتسم (هنداوي) ثانية , و أجاب في عفوية:
- يا سلام .. وهي دي شغلانه..!! ما العاطلين إللي مش لاقيين شغل يامه.. وأكتر من الهم على القلب.. نديهم سلاح .. و نشغلهم غفرا .. و بدل مايبقو صيّع و بلطجيه.. هنديهم ماهيه.. و هيلموا بقية المجرمين و البلطجيه ..و الأقسام هنشغلها.. بالطلبه المتخرجين من الحقوق .. و المأموريات.. بالعساكر ..و الظباط الموجودين في الجيش.. بدل ما كل شويه نديهم تأجيل .. في تأجيل ..عشان مش عارفين نصرف عليهم .. أو نتحمل أكلهم..!!
نظر إليه الرجل في ذهول , و قال :
- معاك حق والله ياعم هنداوي .. دى فكره ..عبقرية..!! إزاي مخطرطش على بال حد..؟!
ابتسم (هنداوي) بفخر ,و قال في ثقة:
- لإنهم مش عاوزين يحلو المشكله يابيه.. عاوزينها تفضل كده بايظه .. عشان نفضل غرقانين .. و ملهيين في إللى احنا فيه.. و نمد إيدنا للي يسوى .. وإللى ميسواش.. و نفضل طول عمرنا مذلولين .. و متقمش لنا من بعدها قومه..!!

(5)

.. تفهم المراسل الصحفي وجهة نظر (هنداوي) , و سأله مستزيداً :
- و هتعمل إيه تاني .. ياعم هنداوي..؟!
أجابه مسترسلاً :
- تاني هام .. هأعمل بيت مال.. عشان أخد من الأغنيا .. و أعطي للفقرا .. يعني بدل ما الزكا تتوزع بمعرفة كل واحد .. و نفسه.. لأ .. الحكومه تجمعها من الناس .. و توزعها بالعدل على المحتاجين .. و تعمل بيها مشاريع .. و مساكن .. و مستشفيات.. و مدارس.. و طرق.. و ملاجئ أيتام .. و دار للمسنين.. أصل البلد دي فيها ناس عايشه كويس .. و ناس كويس إنها عايشه..!!
اندهش الرجل من أفكار (هنداوي) ,و سأله مستفسراً:
- يعني أنت عاوز تعمل .. وزارة تضامن اجتماعي..؟!
قاطعه (هنداوي) قائلاً:
- لأ يا بيه .. تكافل..!! كل واحد يكفل غيره.. الغني يكفل جاره الفقير.. و الشارع يكفل بعضه.. و القريه تكفل أهاليها.. و المحافظة تكفل نفسها.. و البلد تراعي الكل.. و متفرقش بين ريف و حضر.. بحري و قبلي.. مسلم و مسيحي.. كلنا واحد .. زي بعض ..أولاد تسعه .. و أمنا هيا مصر..
سأله المراسل متعجباً:
- طب مادي نفس فكرة الضرايب.. يعني أنت عاوز تزود الضرايب على الشعب..؟!
أجابه مستنكراً:
- يا سابل الستر يارب .. لا يا باشا .. ضرايب إيه كفانا الشر..!! دا حتي أسمها بيحبس الدم.. أنا بقولك زكا.. كل واحد بيزكي عن ماله .. و عياله .. عن صحته .. و عافيته.. يعني إللي بيزرع.. يطلع زكا عن محصوله .. و إللي بيبيع .. يطلع زكا عن تجارته.. و إللي بيشتغل.. يطلع زكا عن ماله .. و إللي بيصنّع .. يطلع زكا عن إنتاجه.. دا حتي إللي بيصوم .. بيطلع زكا عن صومه..!!
فسأله الرجل بنفاذ صبر:
- طيب إزاي هتنفذ دا كله .. ياعم هنداوي ..؟! أنت هتجبر الناس يدفعو كل ده .. غصب عنهم..!!
أجابه علي الفور :
- لا يا باشا.. مافيش غصب .. ولا أيوها حاجه..!! كل واحد هيدفع بخُطره.. و من ضميره.. لما يحس إن فلوسه دي لله.. و راحه في مكانها.. مش هتتسرق.. ولا تتسفر بره .. في بنوك سويسره .. و أدينا شفنا أهوه .. إن الحرام مابينفعش .. و أخرته هتبقى في طره.. عملوا إيه أصحاب الملايين بفلوسهم الحرام..؟! آخرتهم ناموا على البُرش.. أو هيتدفنو تحت الأرض .. في حفره متر في متر.. ماهينوبهم غير حتة قطنه.. و كفن من غير جيوب.. و حسابهم عند الحي الذي لا يموت.. علام الغيوب.. ربنا يستر علينا .. و على ولايانا.
فسأله في خبث:
- طيب ..و المسيحيين هما كمان هتدفعهم زكا..؟! ولا هيدفعو الجزيه.. زي مابيقولو السلفيين..!!
ابتسم (هنداوي) , و قال في سماحة:
- يابيه متعومش على كلام الجماعه التانيين.. إحنا كلنا أخوان .. و مصريين.. في مركب واحده.. و البيت لاذق في البيت.. متقدرش تفرق بينّا إحنا الأتنين.. و إللي هيسري على المسلمين .. هيسري على المسيحيين.. و الخير هيعم على الجميع .. أصل الطوفان لما بيجي .. مبيفرقش بين الغرقانين.. و لازم كلنا نكون مستعدين .. و أيد واحده على المعتدين..!! قول آآآمين.

(6)

تمادى المراسل الصحفي في سخريته , و سأل (هنداوي) :
- طيب قولي .. هتعمل إيه في التعليم.. ياعم هنداوي..؟!
أجابه (هنداوي) على الفور:
- هالغي الثانوية العامة..!!
قاطعه الرجل ضاحكاً:
-هاتلغي الثانوية العامة مره واحده..!! أمال الناس هتدخل الكليات إزاي..؟!
أجابه (هنداوي) في أسي:
- ماهو أصل الثانويه العامه دي بقت زي البعبع.. كله خايف منها .. وعاملّها ألف حساب.. و البيت إللي عنده حد في الثانويه.. زي اللي مقتوله قتيل ..عايشين في هم بالليل ..و مذله بالنهار.. قوم لو لغيناها ..و خليناها سنه عاديه.. زي أي سنه.. خلاص .. يبقى شيلنا حمل كبير من على الطلبه و أهاليهم..!!
قاطعه مستفسراً:
- بس أنت كده .. هتخلي كل السنين تبقى ثانويه عامه.. و الدروس الخصوصيه هتكتر..!!
استدرك (هنداوي) قائلاً:
- لا.. يا سيدنا.. أنا مش قصدي كده خالص.. أول هام إللي عاوز يدخل الطب.. لازم يدرس من أول الثانوي.. المواد اللي تساعده .. في الكليه.. لو نفع فيها يدخل من غير مجموع ولا يحزنون.. و إللي عاوز الهندسه نوبه.. يدرس المواد إللي تجهزه أنه يبقى باش مهندس .. و هلما جره يعني من الأول.. نعرف امكانيات.. و مواهب كل واحد.. عشان يدخل الكليه إللي تناسبه.. و كل أب يعرف مستوي إبنه..!!
أومأ المراسل برأسه قائلا:
- و الله فكره ياعم هنداوي.. و إيه كمان..؟!
أجابه (هنداوي) في حماس:
- هألغي مجانية التعليم..!!
نظر إليه في ذهول ؛ كمن رأي مجنوناً , و سأله دهشاً:
- بقى معقول أنت إللي تقول حاجه زي كده.. بعد إللي عمله جمال عبد الناصر.. و خلى كل أولاد الفلاحين .. يبقوا متعلمين..!!
أجابه في حزم:
- يا بيه .. لما كل أولاد الفلاحين يبقو موظفين.. أمال مين إللي هيزرع الأرض في مصر.. و هيطلع خيرها..؟! المفروض التعليم يبقى إلزامي لحد الإبتدائيه.. عشان ميبقاش فيه أميه.. و العيل النابه.. يكمل .. مابنقلش حاجه.. يدوه منحه بالمجان.. و إللي أبوه مقتدر يدفعله .. كل واحد على حسب مقدرته.. و إللي مينفعش في العلام .. يزرع أرض أبوه و جده .. أو يتعلم حرفه و يمسك صنعه.. كل بني آدم ربنا إداله موهبته .. و كتب له رزقه..!!
هز الرجل رأسه علامة الفهم , ثم سأله:
- طيب إيه رأيك في رفع رواتب المدرسين.. و محاربة الدروس الخصوصيه..!!
قاطعه (هنداوي) قائلاً:
- و نحاربهم ليه بس في رزقهم .. يابيه..؟! متخليهم يدو دروس زي ماهما عايزين.. حتي عشان يحسنو دخلهم ..و ميطلبوش من الحكومه زيادة مرتباتهم .. مش أحسن مايقعدو من بعد الساعة أتنين على القهوه.. دا الأيد البطاله نجسه..!!
سأله المراسل الصحفي مستنكراً:
- لكن الدروس الخصوصيه دي .. هتبقي تكلفه كبيره على أولياء الأمور..؟! و بتخلي المدرس يهمل شغله ..عشان يخلي الطلبه تأخد درس عنده..!!
أجابه (هنداوي) , و هو يهز رأسه علامة الفاهم ببواطن الأمور:
- و الله يابيه الغاوي ينقط بطاقيته.. و العيل الضعيف .. عامل زي العيان اللي بيروح للدكتور ..عشان يعالجه .. ولا يديله حقنة مقويات.. عشان يشد حيله.. و المدرس إللي ميراعيش ضميره.. فيه رب فوقه شايف.. و مطلع عليه و هيجازيه.. كمان لازم يكون فيه مفتش بيراقبه.. و يوديه ورا الشمس..!!
خطر له خاطر فسأله :
-إنت متعلم ياعم هنداوي..؟!
أجابه بفخر:
أمال يابيه.. أنا ساقط إبتدائيه.. قد الدنيا..!!

(7)

قهقه الرجل ضاحكاً , حتى دمعت عيناه , ثم قال ساخراً :
- ماشاء الله.. ياعم هنداوي.. دا حاجه عظيمه..!!
ثم أردف سائلاً :
- طيب وهتعمل إيه في الصحه..؟!
تلمز (هنداوي) بشفتيه , وقال في حزن:
- الصحه .. ماراحت..؟!
استدرك المراسل قائلاً:
- لأ.. أنا قصدي .. هتعمل إيه في وزارة الصحه..؟!
زفر (هنداوي) بقوة , و قال:
- و الله يابيه.. أنت جيت على الوجيعه.. الواحد مش عارف يعمل إيه.. ؟! مش عارفين نلاقيها منين ولا منين..؟! من البلهارسيا .. للكبد الوبائي .. لفيرس سي .. لفشل كلوي.. لأورام الأطفال .. للضغط .. و القلب.. و السكر.. لأنفلونزا طيور .. لخنازير .. لجنون بقر.. لمبيدات مسرطنه .. أنت تحس كده إن فيه حد مستقصد البلدي..!!
قاطعه المراسل سائلاً:
- ماشي ياعم هنداوي .. أنا معاك في كل إللي قلته.. تعمل إيه بقه .. لو بقيت رئيس للجمهوريه..؟!
ضرب (هنداوي) كفاً بكف , و قال في أسي:
- قول أنت بقااا..!!
ثم استطرد قائلاً:
- شوف يابيه.. ربنا هوا الشافي المعافي.. و الشكوه لغير الله مذله .. الموضوع مش قلة فلوس و بس..!! لأ .. الموضوع سببه قلة الضمير.. لو كل واحد عنده ضمير مايأذيش أخوه.. لا تلاقي إللي بيجيب أكياس دم فاسده .. ولا أدويه منتهيه الصلاحيه .. ولا مكن غسيل كلوي مستعمل و ملوث.. ولا حقن الطراطير بتاعة زمان .. تنعطى من ده لده .. من غير ماتتعقم .. ولا الأرض تنزرع بمية مجاري ..ولا نرمي الصرف بتاع المصانع والأرض في النيل.. ولا نجيب مبيدات وأغذيه أطفال مسرطنه .. ولا نستورد لحمه فاسده .. و نغش كل حاجه .. حتى اللبن و العسل كمان..!!
قاطعه المراسل بنفاذ صبر:
- يعني هتعمل إيه.. ياعم هنداوي..؟!
أجابه في حيرة:
- العمل عمل ربنا يابيه.. إلاهي إللي يعمل كده تتقطع إيده .. أو يتشك في نظره.. و يقعدله في صحته .. و عافيته .. و عياله.. و تبقى آخرته سوده .. قادر ياكريم..!!
ثم أردف قائلا:
- و بعدين مايقدر على القدره إلا ربنا .. نوضب المستشفيات إللي بقت عامله زي .. زريبة المواشي .. و نجهز أود العمليات .. إللي شكلها ولا السلخانه.. و نوفر الدوا إللي سعره بقى في السما .. و نعالج المحتاج ببلاش ..على نفقة الدوله.. و إللي معاه نعالجه استثماري.. مش نسفر الوزرا ..و قرايبهم يتعالجو بره .. و نسيب الشعب يموت جوه..!!
أوما المراسل برأسه علامة الموافقة , ثم سأله :
- طيب و الأطباء .. مش هتزود رواتبهم هما كمان..؟!
أجابه إجابة قاطعة:
- لأ..!!
ثم استطرد قائلاً:
- الدكتور .. مش هيكون له راتب من أساسو..!! بس هيكون له نسبه من كل حاجه هيعملها.. سواء كان كشف أو عمليه.. عشان نشجعهم إنهم ميزوغوش من المستشفيات الحكومي .. و يروحو لعيادتهم .. و المستشفيات الخاصه.. و في آخر كل شهر ضامنين مرتبهم في جيوبهم..!!

(8)

بعد ذلك سأله المراسل الصحفي قائلا:
- طيب .. و السياحه ياعم هنداوي .. هتعمل فيها إيه..؟ً!
فابتسم (هنداوي) ابتسامة عريضة , و قال:
- مالها السياحه.. هيا كمان يابيه..؟! ماتسيب إللي عاوزين يسيحو.. يسيحو في ملكوت الله .. دا الملك لله وحده .. و ربنا بيجازي كل واحد على قد عمله..!!
قاطعه الرجل قائلاً:
- إنت مش فاهم قصدي ياعم هنداوي..!! يعني أنت موافق إن الستات ينزلو البحر.. و يلبسو بيكيني ..؟!
رفع (هنداوي) حاجبيه دهشاً , و سأله في تعجب:
- وهوا إيه البيكيني ده..؟! مش دا برضو نوع بط ..!!
فضحك الرجل حتي كاد يسقط على الأرض , ثم قال , و هو مستمر في الضحك:
- لا ياسيدي مش نوع بط .. بس زي ماتقول كده .. ستات قالعه ملط..!!
تأفف (هنداوي) , و قال في اشمئزاز:
- أستر على ولايانا يارب..!! طب وليه كده يابيه..؟! دا الستر أولى .. هوا فيه راجل يرضى الست بتاعته.. ولا أمه.. ولا أخته .. ولا بنته تلبس كده..؟! قصدي تقلع كده..!! ياعيب الشوم يارجاله..!!
أجابه المراسل في حرج:
- و الله الموضوع ده .. مش عيب عند الأجانب.. و دي حريه شخصيه..!!
قاطعه (هنداوي) غاضباً :
- حريه شخصيه لما يبقى في أودة النوم ..أو في الحمام بتاعه .. مش قدام الناس كده عيانا بيانا .. جهاراً نهاراً.. كده من غير حيا ولا ضمير..!!
قاطعه الرجل قائلاً:
- الموضوع ده عادي عندهم .. دا حتي بيعملو شواطئ للعراه هناك..!!
بصق (هنداوي) على الأرض قائلاً في حنق:
- إخص عليهم و على إللي رباهم.. دي فتنه يابيه.. و رجس من عمل الشيطان.. أعوذ بالله.. دول ناس لاعندهم مله ولا دين.. هوا ربنا أمرنا بكده..؟! فين دول من ستنا مريم العفيفة الشريفة ..؟! ولا من مرات سيدنا موسي إللي كانت بتمشي وراه متغطيه .. و كلها حيا..!!
استدرك الرجل قائلاً:
- أمال هتقول إيه .. في موضوع الخمره .. إللي بتتقدم لهم في الفنادق..؟!
انزعج (هنداوي ) و قال مسرعاً:
- خمره..!! هيا حصلت كمان لموضوع الخمره..؟! لعن الله الخمر.. و شاربها ..و ساقيها .. و بائعها.. و حاملها ..!! دا فُجر و العياذ بالله .. بقى هيا دي السياحه بس يابيه ..؟! نسوان ملط .. و خمره .. مش ناقص تقولي قمار كمان..؟!
قاطعه المراسل نافياً:
- لأ.. مافي السياحة العلاجيه.. و سياحة الآثار.. و المعالم الطبيعيه .. و من ضمنها سياحة الشواطئ.. و خدمة السواح في الفنادق.. أصل واجب الضيافه يحتم عليك أنك تعملهم .. و تجبلهم كل إللي هما عاوزينه..!!
ابتسم (هنداوي) , و قال ساخراً:
- أجبلهم كل إللي هما عاوزينه..؟! ياحلاوه ياولاد..!! يعني لو حد منهم حِلت في عينه أختك .. ولا مراتك.. تديهاله..؟! عيب ياراجل الكلام ده..!! أنتو ماتعرفوش حاجه عن كرم الضيافه بتاتاً ..!! الضيافة لها أصول.. و الكرم العربي .. مالوش مثيل.. بس بالأصول..!! الضيف لما بيكون عندك في بيتك بتقدمله أحسن ماعندك.. و توجبه أجدع واجب ..بس من الأكل إللي بتاكله.. و اللبس إللي بتلبسه..!! و لزمن هوا كمان .. يراعي أصول الضيافه .. و يحافظ على حرمة البيت .. إللي هوا فيه..!!
استوقفه قائلاً:
- بس أنت كده هتطفش السواح .. و هتقضي على السياحه.. و هتقفل بيوت كتير ..مفتوحه من وراها..!!
أجابه (هنداوي) في حزم:
- قُطع العيش.. إللي متغمس بعار ..!! على رأي المثل.. الشريفة تبيع شعرها .. ولا تتاجر بعرضها ..!! و يوم مالناس تعرفك على حقيقتك .. و تعرف أنك بتحترم نفسك .. و بتصون عرضك ..و عرض كل إللي يجي عندك.. هيرجعولك من تاني.. و يطبّعو بطبعك ..لأن الدين المعامله يا باشا..!!

(9)

قاطعه قائلاً:- طيب بالمناسبه .. إيه رأيك في حقوق المرأة..؟!
قطب (هنداوي) حاجبيه , و سأله مستنكراً:
- و مالها المرأه..؟! هيا ناقصها حقوق.. في الزمن ده..!! ولا عايزه تجور كمان على حقوق الرجاله..؟! المرأه طول عمرها واخده وضعها.. مش دي أمي الله يرحمها .. و أمك.. و مراتي و مراتك.. أختي و أختك.. بنتي و بنتك.. يعني إللي ماترضهوش لأختك مترضهوش لأخت غيرك.. و أكيد مش هتظلم أهلك .. و هتديهم حقوقهم زي ماربنا أمرك .. و النبي عليه الصلاة و السلام وصانا..!!
أردف قائلاً:
- أنا قصدي .. إيه رأيك في عمل المرأة..؟!
أجابه (هنداوي) في حزم :
- لازمن طبعاً..!! تشتغل.. و تساعد جوزها .. عشان يعرفوا يربوا العيال .. و يوصلوهم لبر الأمان .. دا واجبهم هما إللي اتنين .. عندنا في البلد الست بتعمل كل حاجه.. بتفلّح في الأرض.. و بتربي البهايم ..و بتحلبهم.. و تربي الفراخ ..و البط ..و تلم البيض .. و بتعمل الجبنه ..و السمنه .. و القشطه.. و بتبيع في السوق .. و بتخبز .. و تطبخ.. وبتنضف البيت.. بتكنس ..و تغسل .. و تمسح.. و بتربي العيال.. و يرجع جوزها آخر النهار من الغيط .. يلاقيها قاعده زي الفل مستنياه ..ومحضراله لقمه سخنه .. و هدمه نضيفه.. بصراحه كتر ألف خيرهم.. و ربنا يعينهم .. و يبارك فيهم .. بيتعبو فعلاً..!!
قاطعه قائلاً:
- انا مش قصدي كده.. أنا قصدي.. تنزل تشتغل بره البيت..!!
ضرب (هنداوي) على صدره قائلاً:
- تخدم في البيوت..؟! ياعيب الشوم .. لا يابيه .. إحنا عندنا الست تخدم جوزها .. و عيالها بس.. كله إلا خدمة البيوت..!!
نفذ صبر المراسل , و قال في غيظ:
- ياعم هنداوي .. بقولك تشتغل بره.. إنت ماسمعتش عن المرأه العامله..؟!
ابتسم (هنداوي) , و هز رأسه علامة الفهم قائلاً:
- أيوه ..أيوه.. أيوه.. مش إنها تشتغل دكتوره .. و مدرسه.. و مهندسه.. و الذي منه..!!
أجابه قائلاً بنفاذ صبر:
-أيوه عليك نور .. و وزيره .. و سفيره ..و قاضيه.. و صحفيه .. و مذيعه .. و مضيفه .. و فنانه..!!
قاطعه قائلاً:
-لا يابيه.. أحنا متفقناش على كده..؟! مافيش مانع إنها تشتغل الحاجات إللي ماينفعش فيها الرجاله.. زي لا مؤاخذه دكتوره نسا .. ولا مدرسه في مدرسة بنات.. ولاحتي تشتغل في البوليس .. عشان تستجوب الستات .. و تحرس سجن النسا.. لكن الوظايف اللي ملهاش عازه .. و إللي ممكن أي راجل ..يحل محلها .. لأ.. يبقى إيه لازمتها تخرج من البيت ..؟! و تزاحم الرجاله في رزقهم.. ولا حتى تزاحمهم في المواصلات.. و تعرض نفسها للي يسوى وإللي ميسواش..!!
أبدي الصحفي امتعاضه من آراء (هنداوي) التي لم تأت على هواه , متهماً إياه بالرجعية و التخلف, ثم سأله في إزدراء:
- طيب أمال .. هتقول إيه بقى .. في النقاب ..و الحجاب..؟!
أجابه (هنداوي) في يسر:
- إهييييه..!! أشمعنى ياعني أنت قلت من شويه على البتاع ده .. إللي إسمه بيكيني .. حريه شخصيه ..؟! هوا يعني الحجاب و النقاب كخه ..!! و الله إللي عاوزه تتحجب .. و تنفذ شرع ربنا.. الله يباركلها.. و إللي عاوزه تزودها شويه.. و خايفه على الناس من الفتنه.. على راحتها..!! مدام مبتأذيش غيرها.. و إللي مش عاوزه تلبس ده ولا ده..؟! هي حره.. ربنا يهديها بقه.. و حسابها عند إللي خلقها..!!

يتبع